Formohet Bordi Ndërkomunal për Menaxhimin e Mbeturinave për rajonin e Pellagonisë

Komunat e rajonit të Pellagonisë dhe atij Jugperëndimor sot, në Shkup, mbajtën seancë konstituive dhe zyrtarisht formuan Bordin Ndërkomunal për Menaxhimin e Mbeturinave (BNMM) – një mekanizëm formal dhe funksional që bashkon dy rajonet në një strukturë të vetme për menaxhimin e mbeturinave. Me këtë, shteti bën një hap vendimtar drejt futjes së një sistemi modern dhe të koordinuar për menaxhimin e mbeturinave sipas standardeve evropiane.

Në ngjarje folën Zllatko Perinski, Ministër i Vetëqeverisjes Lokale; Ane Lashkoska, Zëvendësministre e Mjedisit Jetësor dhe Planifikimit Hapësinor; Dushica Perishiq, Drejtoreshë Ekzekutive e BNML-së (ZELS); Igor Nikovski, Drejtor i Drejtorisë për Mjedis Jetësor dhe Lena Falcon, Drejtoreshë e Programit në SALAR International.

Menjëherë pas fjalimeve përshëndetëse, u nënshkrua solemnisht marrëveshja për themelimin e BNMM-së. Me themelimin e BNMM-së, komunat bëjnë një kalim të qartë nga zgjidhjet e deritanishme ad-hoc dhe të fragmentuara drejt një qasjeje stabile, sistemore dhe të qëndrueshme. Modeli i ri rajonal mundëson procese të parashikueshme, kompetenca të qarta dhe koordinim ndërmjet institucioneve, gjë që rezulton në organizim më të mirë, përdorim më efikas të burimeve, shërbime më cilësore dhe siguri më të madhe për qytetarët. Kjo qasje sistemore është thelbësore për të siguruar menaxhim konsistent, transparent dhe profesional të mbeturinave, në përputhje me legjislacionin vendas dhe standardet evropiane.

Trupi i sapoformuar do të ketë detyrimin të: miratojë plane rajonale për menaxhimin e mbeturinave; aprovojë investimet kryesore në infrastrukturën rajonale; koordinojë aktivitetet për mbylljen e deponive ekzistuese dhe tejkalimin e problemeve me deponitë ilegale; mbikëqyrë zbatimin e Sistemit Rajonal për Menaxhimin e Mbeturinave (SRMM);

Sigurojë transparencë dhe përfshirje aktive të qytetarëve në proces.

Ky mandat i BNMM-së krijon një bazë të fortë për një sistem të stabilizuar, llogaridhënës dhe afatgjatë të qëndrueshëm për menaxhimin e mbeturinave në nivel rajonal.

Me themelimin e BNMM-së praktikisht fillon faza tjetër e reformës për menaxhimin e mbeturinave, e cila përfshin para së gjithash hartimin e Planit të ri Rajonal për Menaxhimin e Mbeturinave 2026–2032, finalizimin e procesit për formimin e ndërmarrjes rajonale komunale, koordinimin e punës së institucioneve kompetente, por edhe angazhim të shtuar për informimin e plotë dhe në kohë të opinionit. Këto aktivitete janë thelbësore për vendosjen e një SRMM-je plotësisht operativ.

Kryetarët e komunave nga të dy rajonet sot treguan nivel të lartë uniteti, përgjegjësie dhe vizioni për shërbime publike moderne dhe mjedis jetësor më të pastër. Përmes vendimit kolektiv, ata treguan se bashkëpunimi rajonal është kyç për zhvillimin dhe cilësinë e jetës së qytetarëve.

Suedia dhe Zvicra, si partnerë afatgjatë, japin mbështetje në proces, duke siguruar stabilitet, ekspertizë dhe kredibilitet në çdo fazë të reformës.

Burimi: РАЦИН.мк