Në Prilep u vu zyrtarisht në përdorim Pika e re Grumbulluese për selektimin dhe depozitimin e mbeturinave
Komuna e Prilepit, së bashku me NP "Komunalec", zyrtarisht e vuri në përdorim Pikën e re Grumbulluese për selektimin dhe depozitimin e mbeturinave, me çka bëhet një hap i rëndësishëm drejt krijimit të një sistemi më të organizuar, më të qëndrueshëm dhe më ekologjik për menaxhimin e mbeturinave.
Gjithashtu, në Prilep arriti edhe një automjet i ri i specializuar për mbledhjen e mbeturinave, i siguruar përmes Ministrisë së Mjedisit Jetësor dhe Planifikimit Hapësinor, si pjesë e Programit Rajonal për Menaxhimin e Mbeturinave të Ngurta.
Pika e re grumbulluese ndodhet në rrugën "Trajko Nikolloski", para hyrjes së garazheve të NP "Komunalec", në një lokacion të sigurt dhe të kontrolluar me mbikëqyrje 24-orëshe, me qëllim mbrojtjen e infrastrukturës dhe përdorimin e saj të drejtë.
Prej sot, qytetarët në një vend do të mund të depozitojnë në mënyrë të rregullt mbeturina elektrike dhe elektronike, mbeturina nga produktet tekstile, ambalazh qelqi, letër dhe plastikë.
Pajisjet komunale për mbledhjen e mbeturinave elektrike dhe elektronike janë siguruar nga operatori kolektiv El Kolekt, i cili, në përputhje me detyrimet ligjore, do t'i mbledhë, transportojë dhe riciklojë këto mbeturina. Në pikën grumbulluese do të mund të depozitohen pajisje të vogla shtëpiake, pajisje IT dhe kompjuterike, telefona, kabllo, llamba, monitorë dhe lloje të tjera të mbeturinave elektrike dhe elektronike.
Përveç kësaj, është vendosur edhe një kontejner në formë “zileje” për ambalazh qelqi, si dhe kontejnerë për ambalazh PET, letër dhe karton, me qëllim që edhe qytetarëve që nuk janë pjesë e sistemit të selektimit në amvisëri t'u mundësohet përfshirje aktive në procesin e menaxhimit të drejtë të mbeturinave.
Në bashkëpunim me operatorin kolektiv Teksomak dhe fushatën "Selekto mbeturinat", fillon edhe mbledhja sistemore e mbeturinave tekstile. Qytetarët do të mund t'i depozitojnë mbeturinat tekstile në pikën grumbulluese para NP "Komunalec", në hapësirën e "Komfi Angel", ose përmes aplikacionit të paraqesin kërkesë për grumbullimin e mbeturinave drejtpërdrejt nga shtëpia e tyre.
Nga Komuna e Prilepit theksojnë se kjo pikë grumbulluese paraqet fillimin e një qasjeje të re sistemore në menaxhimin e mbeturinave, me të cilën rritet vetëdija publike dhe krijohen kushtet për sistemin e ardhshëm rajonal dhe deponinë rajonale.
Njëkohësisht, Komuna e Prilepit dhe NP "Komunalec", tashmë po punojnë edhe në një projekt për ndërtimin e një Qendre të madhe moderne Grumbulluese, ku do të selektohen së paku 30 lloje të mbeturinave, në përputhje me standardet bashkëkohore dhe detyrimet ligjore.
Me këto aktivitete, vetëqeverisja lokale vazhdon investimet në infrastrukturë moderne komunale dhe projekte që kontribuojnë drejtpërdrejt për një qytet më të pastër, më të rregulluar dhe më të shëndetshëm.
Burimi: prilep.gov.mk