U mbajt punëtoria e parë për përgatitjen e Planit të ri Rajonal për Menaxhimin e Mbeturinave për Rajonin e Pellagonisë dhe Rajonin Jugperëndimor

Pas përfundimit të Forumit Rajonal për Menaxhimin e Mbeturinave në Shkup, më 29 dhe 30 prill 2026, u mbajt edhe pjesa punuese e ngjarjes kushtuar përgatitjes së Planit të ri Rajonal për Menaxhimin e Mbeturinave (PRMM) për Rajonin e Pellagonisë dhe Rajonin Jugperëndimor për periudhën 2027-2032.

Në punëtori morën pjesë përfaqësuesit e komunave dhe ndërmarrjeve publike komunale, anëtarët e grupeve të punës për menaxhimin e mbeturinave, ndërsa në fokus ishin diskutimet lidhur me rezultatet nga implementimi i deritanishëm i PRMM-së, sfidat me të cilat përballen komunat dhe prioritetet për periudhën e ardhshme gjashtëvjeçare. Theks i veçantë u vendos mbi nevojën që plani i ri të jetë praktik, i realizueshëm dhe i harmonizuar me nevojat dhe kapacitetet reale të komunave.

Gjatë ditës së parë të punëtorisë u prezantua edhe metodologjia për përgatitjen e PRMM-së së re, e cila parasheh përfshirje aktive të komunave, proces transparent dhe planifikim të bazuar në të dhëna. Përveç kësaj, u prezantua edhe platforma e internetit “Rajon pa mbeturina”, e cila do të shërbejë si mjet i centralizuar për qasje në informacione, ndjekje të gjendjeve dhe mbështetje të procesit të vendimmarrjes.

Dita e dytë e punës në punëtori iu kushtua përcaktimit të vizionit dhe prioriteteve të planit të ri rajonal, përmes punës së përbashkët dhe koordinimit ndërmjet të gjitha palëve të interesuara. Qëllimi është të vendoset bazë për një sistem rajonal modern, funksional dhe të qëndrueshëm për menaxhimin e mbeturinave, i cili do të sigurojë shërbime më cilësore dhe mjedis më të pastër për qytetarët.

Procesi realizohet në kuadër të projektit "Menaxhimi i qëndrueshëm i mbeturinave në nivel lokal", financuar nga Suedia, implementuar nga SALAR International, dhe ka për qëllim të sigurojë qasje të koordinuar, gjithëpërfshirëse dhe praktike për vendosjen e një sistemi funksional dhe të qëndrueshëm rajonal për menaxhimin e mbeturinave.